Një katastrofë natyrore ka goditur Zvicrën jugore, ku një pjesë e madhe e Akullnajës Birch u shkëput dhe shkaktoi një ortek masiv akulli, balte dhe shkëmbinjsh që përfshiu fshatin alpin Blatten, në kantonin Valais. Autoritetet kishin urdhëruar evakuimin e rreth 300 banorëve dhe bagëtive në fillim të muajit, si masë paraprake sigurie, për shkak të shenjave të përshpejtuara të lëvizjes së akullit.
Policia lokale konfirmoi se një burrë 64-vjeçar rezulton i zhdukur, ndërsa ekipet e kërkim-shpëtimit po përdorin dronë me kamera termike për të kontrolluar zonën.
"Rreth 90% e fshatit është i mbuluar ose i shkatërruar. Kjo është një katastrofë e madhe për Blatten-in", deklaroi Stephane Ganzer, kreu i sigurisë në Valais.
Pamjet dramatike të shpërndara në rrjetet sociale dhe në televizionin zviceran tregojnë rrëshqitjen masive që ka zhytur shtëpi dhe ndërtesa nën shtresa llumi dhe mbetjesh. Rrjedha e ortekut përfshiu gjithashtu shtratin e lumit Lonza, duke shkaktuar bllokim të rrjedhës dhe rritje të rrezikut për përmbytje të mëvonshme.
Ministri zviceran i Mjedisit, Albert Rösti, gjatë një konference për shtyp e quajti ngjarjen një “katastrofë të jashtëzakonshme”, duke theksuar se qeveria do të ndihmojë familjet që kanë humbur shtëpitë e tyre.
Rrëshqitja ndodhi pas disa ditësh paralajmërimesh nga glaciologët, të cilët kishin raportuar rritje të ndjeshme të lëvizjes së akullnajës mbi fshat. Ushtria zvicerane u mobilizua në terren për të ndihmuar në operacionet e kontrollit dhe shpëtimit.
Ngjarja e rëndë ka thelluar shqetësimet për pasojat e ngrohjes globale, që sipas shkencëtarëve po çojnë drejt shkrirjes dhe tërheqjes së përshpejtuar të akullnajave në Alpe. Zvicra, vendi me më shumë akullnaja në Europë, ka humbur 4% të vëllimit të akullnajave vetëm në vitin 2023, pas një humbjeje rekord prej 6% në 2022.
Shkencëtarët paralajmërojnë se ngjarje të tilla, që dikur ishin të rralla, mund të bëhen më të shpeshta dhe më të rënda në vitet e ardhshme, nëse ndryshimet klimatike nuk trajtohen me masa të forta dhe të menjëhershme.
BREAKING: Massive Glacier Collapse in Blatten, Valais (Switzerland) – May 28, 2025
— Weather Monitor (@WeatherMonitors) May 28, 2025
Over 3.5 million m³ of ice, rock, and snow collapsed from the Birch Glacier, putting 9 million tons of pressure on the glacier.
The entire village of Blatten (approx. 300 people) was evacuated in… pic.twitter.com/ntmV35GL8o
