Instituti i Shëndetit Publik (ISHP) ka konfirmuar se 17 fëmijë në një kopsht në qytetin e Gramshit janë infektuar me bakterin Salmonella Enteritidis, pas analizave laboratorike të kryera ndaj 79 fëmijëve.
Sipas njoftimit zyrtar, për 6 fëmijë të tjerë ende priten rezultatet përfundimtare, megjithatë analizat paraprake kanë treguar një ngarkesë të lartë bakteriale, duke rritur dyshimet për helmim nga salmonela edhe në këto raste.
Autoriteti Kombëtar i Ushqimit (AKU) ka nisur hetimet dhe është duke analizuar mostrat e produkteve ushqimore të konsumuara nga fëmijët në ambientet e kopshtit. Ndërkohë, në qytet ka mbërritur një ekip i përbashkët i epidemiologëve të ISHP-së dhe inspektorëve të AKU-së për të kryer hetime në terren dhe për të marrë masat e nevojshme.
Salmonella Enteritidis është një bakter që zakonisht gjendet në mishin e pulës dhe vezët, dhe mund të shkaktojë infeksione serioze, veçanërisht tek fëmijët e vegjël dhe personat me imunitet të dobësuar.
