Napoli u kthye në një skenë spektakolare festimesh pas triumfit në Serie A, ku qindra mijëra tifozë zbarkuan në rrugë për të kremtuar fitimin e Scudettos.
I gjithë qyteti u përfshi në një entuziazëm kolektiv që i ngjante natës së ndërrimit të viteve, me këngë, fishekzjarre dhe flamuj blu që pushtuan çdo shesh e rrugicë.
Zona të njohura si Lagjet Spanjolle, Via Toledo, Piazza Trieste e Trento dhe Galleria Umberto u shndërruan në epiqendrat e festës, ndërsa forcat e rendit u përpoqën të ruanin rendin në një atmosferë euforie të pakontrollueshme.
Pavarësisht karakterit festiv, nata nuk kaloi pa incidente. Autoritetet raportuan mbi 120 persona të plagosur, kryesisht si pasojë e shtyrjeve, rrëzimeve dhe përdorimit të mjeteve piroteknike.
Shumica morën ndihmë në pikat mjekësore të përkohshme, ndërsa disa u transportuan në spitale – por fatmirësisht, asnjë nuk është në gjendje kritike.
Në Piazza Bovio, vetëm pak metra larg Piazza del Plebiscito, policia u detyrua të rrethojë zonën për të shmangur përplasje në turmën e madhe. Megjithatë, nuk janë raportuar akte dhune apo përleshje fizike. Prania e bombave tymuese dhe fishekzjarreve shtoi tensionin, por situata u menaxhua pa pasoja të rënda.
