Të paktën 60 persona janë vrarë brenda 24 orëve të fundit në Gaza nga sulmet izraelite, sipas agjencisë palestineze të mbrojtjes civile. Pavarësisht paralajmërimeve të agjencive ndërkombëtare për uri masive, ushtria izraelite po përshkallëzon ofensivën ushtarake.
Mes viktimave janë 10 persona në qytetin jugor Khan Younis, katër në Deir al-Balah dhe nëntë të tjerë në kampin e refugjatëve Jabaliya, në veri. Spitalet Nasser, al-Aqsa dhe al-Ahli kanë konfirmuar rastet.
Një ditë para këtyre sulmeve, tanket dhe dronët izraelitë goditën spitalin al-Awda në veri, duke shkaktuar zjarr dhe dëme të mëdha. Pamjet e shpërndara nga zyrtarët shëndetësorë tregojnë mure të shkatërruara dhe tym të zi që ngrihet mbi rrënoja.
Ushtria izraelite ka deklaruar se ka goditur "objektiva terroriste", përfshirë magazina armësh dhe pozicione snajperësh. Gjithsej, sipas tyre, janë goditur mbi 75 objektiva në gjithë Rripin e Gazës.
Ndërkohë, Kombet e Bashkuara dhe Kryqi i Kuq paralajmërojnë për një uri masive, pas më shumë se 3 muajsh bllokade ndaj ndihmave humanitare. Vetëm në disa ditë të fundit, janë regjistruar 29 vdekje nga uria, përfshirë fëmijë dhe të moshuar, sipas ministrit palestinez të Shëndetësisë.
Mjekët raportojnë mungesë të theksuar të barnave bazë, me mbi 40% të ilaçeve esenciale që kanë mbaruar. Ka mungesë të theksuar edhe për produkte elementare si fashat, dorezat, ilaçet për sëmundje të lëkurës dhe infeksione të syve, të përhapura për shkak të kushteve të mjerueshme higjienike.
Pavarësisht presionit global, Izraeli ka lejuar vetëm një sasi minimale ndihmash. Sekretari i Përgjithshëm i OKB-së, António Guterres, deklaroi se:
“Ndihmat që lejohen nga Izraeli janë si një lugë çaji, kur nevojitet një përmbytje ndihmash për të shmangur më të keqen.”
Ndërkohë, 107 kamionë ndihmash hynë në Gaza të enjten, por shumë pak nga to kanë arritur tek njerëzit që po vuajnë. Shumica e ndihmave janë shpërndarë në furrat e bukës në jug të territorit, ndërsa veriu vazhdon të jetë i izoluar.
Ndihmat po përballen edhe me plaçkitje: një konvoj i Programit Botëror të Ushqimit u sulmua të enjten mbrëma dhe 15 nga 20 kamionë me miell u grabitën.
