Një qytetar ka dërguar në redaksinë e JOQ Albania një denoncim shqetësues që lidhet me mungesën e mirëmbajtjes së varrezave në fshatin Kashnjet, Njësia Administrative Ungrej, në Lezhë.
Pamjet flasin vetë: varret janë mbuluar totalisht nga bari dhe ferrat, aq sa bëhet thuajse e pamundur të dallohet ndonjë gur varri. Kjo gjendje është bërë shkak që një familje e ardhur nga diaspora të mos arrijë dot të gjejë varrin e gjyshit të tyre.
Në foto shfaqet gjendja aktuale e varrezave në fshatin Kashnjet, ku bari dhe ferrat kanë pushtuar tërësisht hapësirën, duke mbuluar varret.
Barishtet e larta që kanë mbuluar varrezat jo vetëm e bëjnë të pamundur gjetjen e varreve, por paraqesin edhe rrezik real për qytetarët, pasi mund të fshehin gjarpërinj që mund të shkelën aksidentalisht nga vizitorët.
Denoncuesi shprehet:
“Përshëndetje JOQ! Kishte ardh nga diaspora një familje për pushime dhe kanë dalë për të vizituar varrin e gjyshit në fshat për t’i ndez një qiri. Ata duke pritur pasaportën europiane për të cilën kishin ‘votuar’ s’po gjenin dot varrin nga ferrat dhe barishtet. Në varrezat e fshatit Kashnjet, njësia administrative Ungrej, bashkia Lezhë!! Pamjet nga një banor i zonës që jeton në diasporë!”
Ky denoncim është një thirrje e qartë ndaj Bashkisë Lezhë për të marrë masa dhe për të garantuar një mirëmbajtje minimale të varrezave, për respektin që u detyrohet të ndjerëve dhe familjarëve të tyre.
