Një studim i ri klinik, më i madhi në botë për efektet e konsumit të moderuar të alkoolit, ka nisur në Spanjë dhe po fton mijëra vullnetarë për të zbuluar nëse një gotë verë në ditë ndihmon apo dëmton shëndetin.
Ky projekt, i quajtur UNATI (Nisma e ish-Studentëve të Universitetit të Navarrës), do të ndjekë për katër vitet e ardhshme 10,000 persona të moshës 50-75 vjeç. Qëllimi është të matet ndikimi i konsumit të përditshëm të alkoolit (si verë, birrë apo pije të tjera) në sëmundjet kardiovaskulare, kancer, shëndetin mendor dhe vdekshmërinë.
Studimi drejtohet nga profesori i mjekësisë parandaluese Miguel Angel Martinez-Gonzalez, ekspert i njohur i dietës mesdhetare, dhe është financuar me 2.4 milionë euro nga Këshilli Evropian i Kërkimeve.
Deri më tani janë përfshirë 6500 pjesëmarrës, ndërsa kërkohen edhe 3500 të tjerë deri në qershor 2025. Të interesuarit duhet të jetojnë në Spanjë, të jenë meshkuj 50-70 vjeç ose femra 55-75 vjeç dhe të konsumojnë të paktën tre pije alkoolike në javë. Nuk pranohen persona abstinentë apo me probleme shëndetësore që e ndalojnë konsumimin e alkoolit.
Pjesëmarrësit do të ndahen në dy grupe: njëri do udhëzohet të shmangë plotësisht alkoolin, ndërsa tjetri do ndjekë një model të moderuar konsumimi sipas dietës mesdhetare, kryesisht verë ose birrë me ushqim.
Çdo pjesëmarrës do të plotësojë sondazhe të detajuara shëndetësore në fillim dhe në fund të studimit, do marrë pjesë në takime tremujore online me trajnerë shëndeti, si dhe do kryejë kontrolle vjetore mjekësore. Studimi mbështetet nga mbi 500 profesionistë, si mjekë, dietologë dhe psikologë.
Një pjesë tjetër e projektit, UNATI-Sueño, e koordinuar nga Universiteti i Valladolidit, po studion ndikimin e alkoolit në cilësinë e gjumit dhe po rekruton persona të gatshëm të kalojnë një natë të monitoruar në qytetin Soria.
Studiuesit theksojnë se qëllimi nuk është promovimi i alkoolit, por sqarimi nëse konsumimi i moderuar ka vlera shëndetësore apo jo.
Për ata që tashmë pinë në mënyrë të moderuar, ky është një rast i rrallë për të marrë pjesë në një studim ndërkombëtar të rëndësishëm dhe për të përmirësuar stilin e jetesës në mënyrë të mbikëqyrur.
