Një aksident tragjik u regjistrua këtë të hënë rreth orës 14:40 në zonën e Yrshekut në Tiranë, ku një i moshuar humbi jetën pasi u përplas nga një automjet i drejtuar nga një 15-vjeçar.
Sipas Policisë, adoleshenti po drejtonte një makinë të familjarëve të tij kur përplasi shtetasin S. V., 82 vjeç, i cili ishte duke lëvizur me biçikletë. I moshuari nuk i mbijetoi plagëve të marra dhe ndërroi jetë rrugës për në spital.
15-vjeçari u arrestua nga shërbimet e Policisë, ndërsa materialet procedurale i janë referuar Prokurorisë së Tiranës për veprime të mëtejshme.
Ngjarja ngre shqetësime serioze mbi sigurinë rrugore dhe mbikëqyrjen e fëmijëve në drejtimin e mjeteve pa leje. Autoritetet pritet të hetojnë edhe përgjegjësinë e familjarëve që lejuan minorenin të marrë timonin.
