Prokuroria e Tiranës ka vendosur masën e sigurisë “arrest me burg” për 26-vjeçarin Rei Nozlli, i cili dhunoi sekretarin e KZAZ nr. 30 në zonën e Kasharit, gjatë procesit të numërimit të votave.
Ngjarja ndodhi më 15 maj, rreth orës 14:00, teksa po numëroheshin fletët e votimit. Sipas hetimeve paraprake, gjithçka nisi kur sekretari i KZAZ-së, Remzi Memedi, shpalli të pavlefshme një votë, vendim që u kundërshtua ashpër nga Rei Nozlli dhe disa persona të tjerë që ndodheshin me të në ambientet e numërimit.
Pavarësisht se nuk kishin statusin e vëzhguesit të ndonjë subjekti politik, Nozlli dhe shoqëruesit e tij po ndiqnin procesin nga afër. Në një moment, Nozlli kaloi shiritin e sigurisë dhe sulmoi fizikisht sekretarin, duke e goditur me grushte dhe shkelma. Pas tij ndërhynë edhe persona të tjerë, por u penguan nga numëruesit e pranishëm, të cilët u përpoqën t’i neutralizonin fizikisht.
Rei Nozlli akuzohet për veprën penale “Kanosje apo dhunim ndaj pjesëmarrësve në zgjedhje”.
