62-vjeçari në gjendje të rëndë, Agroni kërkon ndihmë për një vend në azil

Një thirrje që të trondit shpirtin vjen nga Tirana. Agron Naska, 62 vjeç, banues në zonën e Misto Mames, pranë pallateve “Çabej” në rrugicën nr. 8, është në një gjendje të rëndë shëndetësore dhe jeton i braktisur, pa asnjë mbështetje nga familja apo institucionet.

Agroni shfaqet i pafuqishëm për të lëvizur, ndërsa rrëfen mes lotësh gjendjen ku ndodhet:

“Jam i braktisur, jam i sëmurë, jam i paralizuar. Jetoj vetëm. Nuk kam asnjë lloj ndihme, asnjë përkrahje. Ju lutem, më ndihmoni, më çoni në ndonjë azil… jam vetëm, s’kam njeri, nuk lëviz dot. Edhe fëmijët, vajzat nuk më ndihmojnë dot. Çfarë të bëj? Më çoni në ndonjë azil, ju lutem.”

Kohët e fundit, gjendja e tij është përkeqësuar edhe më shumë. Para disa ditësh, ai mbeti i paralizuar brenda në banesë dhe vetëm ndërhyrja e zjarrfikësve, të cilët u detyruan të futeshin nga ballkoni, i shpëtoi jetën. Agroni nuk është në gjendje të lëvizë dhe nuk ka asnjë mundësi të kujdeset për veten.

Prej kohësh, ai kërkon ndihmë për një vend në ndonjë qendër sociale ose azil, ku të ketë kujdesin minimal dhe të ndjehet i sigurt. Gjendja e tij psikologjike është gjithashtu e rënduar, pasi ka shprehur dëshirën për t’i dhënë fund jetës, nga mungesa e shpresës dhe vetmia e thellë që e ka mbytur.

Qytetarë të ndjeshëm që kanë njohur rastin, apelojnë për ndihmë urgjente:

“Ky njeri ka nevojë për një azil sa më parë. Jeton vetëm dhe është i sëmurë rëndë. Ka nevojë për përkujdesje 24 orë dhe është në rrezik të përhershëm. Nuk mund ta lëmë në këtë gjendje.”

Kushdo që ka mundësi të ndihmojë ose të ndërmjetësojë për vendosjen e tij në një strukturë sociale, mund të kontaktojë direkt në numrin e tij personal: 069 392 0828