SPAK ka marrë të pandehur Erald Elezin, administratorin e Korporatës Elektroenergjitike Shqiptare (KESH), nën akuzën për shpërdorim detyre dhe shkelje të barazisë në tendera. Të njëjtat akuza rëndojnë edhe mbi kreun e ARRSH-së, Gentian Gyli.
Burime nga hetimi bëjnë me dije për mediat se provat ndaj Elezit janë siguruar nga analiza e celularit të sekuestruar të ish-drejtorit të ARRSH-së, Evis Berberi, i cili ndodhet tashmë nën hetim.
SPAK ka zgjeruar hetimin pasuror ndaj 25 të dyshuarve – 22 individë dhe 3 subjekte private – duke përfshirë dhe procedura të dyshuara për abuzim me fondet e eficiencës së energjisë, të financuara nga Bashkimi Europian.
Hetimet janë ende në zhvillim dhe përfshijnë një tjetër fraksion që lidhet me zyrtarë të lartë të administratës. Në kohën e kryerjes së veprës penale, si Gyli edhe Elezi ishin pjesë e Komisionit të Vlerësimit të Ofertave (KVO), në varësi direkte të Evis Berberit.
