Një shtetas shqiptar 38 vjeç, banues në Gjermani dhe me leje qëndrimi të rregullt në këtë shtet, është arrestuar nga autoritetet italiane në qytetin e Komos. Ai u kap në orët e para të mëngjesit të së premtes në një motel të ndodhur në “Via P. Paoli”, pas ndërhyrjes së Policisë së Shtetit të Komos.
Arrestimi u bë i mundur falë sistemit elektronik “Web Lodgers”, i cili i jep mundësi forcave të rendit të kontrollojnë të dhënat personale të klientëve të strukturave akomoduese në kohë reale. Pasi emri i 38-vjeçarit u regjistrua në këtë platformë, autoritetet konstatuan se ndaj tij ekzistonte një urdhër arresti i lëshuar nga Gjykata e të Miturve e Triestes që në vitin 2015.
Menjëherë pas sinjalizimit, oficerët ndërhynë dhe e gjetën të kërkuarin në dhomën e motelit. Pas identifikimit, ai u arrestua dhe u shoqërua në Komisariatin e Policisë për procedurat e nevojshme dhe më pas u transferua në Burgun e Komos.
Mediat italiane raportojnë se autoritetet po ndjekin të gjitha hapat ligjorë në vijim për rastin.
