Në një mbledhje të zhvilluar mesditën e së mërkurës, raportohet nga mediat se Këshilli Bashkiak i Durrësit miratoi me 31 vota pro projektvendimin që i hap rrugë ndërtimit të një resorti të ri në Gjirin e Lalzit, duke ndryshuar kategorinë e 8,000 metrave katrorë pyll në zonë. Vendimi u mor pavarësisht shqetësimeve për shkatërrimin e gjelbërimit në një prej zonave më të lakmuara bregdetare të vendit.
Në votim, këshilltarët e Partisë së Lirisë u rreshtuan përkrah këshilltarëve të majtë, duke siguruar shumicën për kalimin e projektit. Nga ana tjetër, vetëm tre këshilltarë të djathtë ishin të pranishëm dhe votuan kundër.
Ndërtimi i resortit “Lura 5”, pjesë e një zinxhiri kompleksesh luksoze në të njëjtën zonë, ishte miratuar më herët nga Këshilli Kombëtar i Territorit, duke e bërë këtë vendim të Këshillit Bashkiak një hap final drejt betonizimit të mëtejshëm të bregdetit.
Pavarësisht se disa këshilltarë opozitarë paralajmëruan për pasojat mjedisore dhe reduktimin e hapësirave të gjelbra, shumica zgjodhi të vendosë interesin ekonomik përpara atij ekologjik. “Nuk jemi kundër zhvillimit, por bregdeti i Durrësit është betonizuar – edhe një resort më shumë është edhe më pak gjelbërim”, u shprehën ata.
Argumenti i zakonshëm për “zhvillimin e turizmit” dhe “krijimin e vendeve të punës” u përdor sërish nga përfaqësuesit e majtë për të justifikuar vendimin. Megjithatë, qytetarët dhe aktivistët mjedisorë paralajmërojnë se ky është vetëm kapitulli i radhës në shkatërrimin sistematik të bregdetit shqiptar në emër të interesave private.
