Një incident i rëndë është shënuar rreth orës 14:00 të ditës së sotme në rrugën “Ali Demi” në Tiranë.
Mësohet se një konflikt i dhunshëm ka ndodhur mes disa shtetasve, në ambientet e zyrës elektorale të partisë së Tom Doshit, PSD.
Në vendin e ngjarjes është konstatuar se është dëmtuar xhami i zyrës, dyshohet me sende të forta, ndërkohë që gjatë këqyrjes janë gjetur edhe dy fishekë luftarak, çka ngre dyshime për përdorim armësh zjarri në këtë përplasje.
Menjëherë pas sinjalizimit, në vendin e ngjarjes kanë mbërritur forca të shumta policie dhe grupi hetimor. Sipas autoriteteve, personat e përfshirë në konflikt janë larguar me një automjet, dhe aktualisht po punohet për identifikimin dhe kapjen e tyre.
Nën drejtimin e Prokurorisë, vijojnë hetimet për të zbardhur motivin e konfliktit si dhe për të dokumentuar të gjitha rrethanat e ngjarjes.
