Eduard Vushaj, një shtetas shqiptar i shumëkërkuar, është arrestuar në Greqi pas një operacioni të përbashkët ndërkombëtar. Policia shqiptare ka njoftuar arrestimin e 39-vjeçarit, i cili ishte në kërkim për një dënim të rëndë prej 16 vjetësh për vjedhje me armë, vepër e kryer në bashkëpunim.
Operacioni, i koduar "Kartela e Kuqe", është finalizuar pas shkëmbimit të informacionit ndërmjet autoriteteve të policisë shqiptare dhe atyre greke, përkatësisht Fast Albania dhe DVP Shkodër, duke përfshirë edhe ndihmën e Interpol Tiranës dhe homologëve të tij në Athinë. Si rezultat, autoritetet greke kanë lokalizuar dhe arrestuar Vushajn, duke e ndaluar atë për ekstradim në Shqipëri.
Në vitin 2016, Gjykata e Shkodrës e dënoi Eduard Vushajn me 16 vjet burg për vjedhje me armë, ngjarje e ndodhur në vitin 2013 në fshatin Grabom. Vushaj, në bashkëpunim me një tjetër person, kishte ndaluar një automjet me dy pasagjerë, i kishte kanosur ata me armë dhe kishte marrë paratë dhe automjetin e tyre, duke i plagosur gjithashtu me thikë.
Për momentin, autoritetet greke kanë arrestuar Vushajn dhe po bashkëpunojnë me Interpolin për ta ekstraduar në Shqipëri, ku do të vuajë dënimin për krimet e tij.
