Në adoleshencë dhe në fillim të të 20-ave është e lehtë të krijosh zakone të këqija, por pak kush mendon se një prej tyre mund të ndikojë direkt në shëndetin seksual.
Sipas ekspertëve, një ndër zakonet më të përhapura mund të rrisë ndjeshëm rrezikun për zhvillimin e disfunksionit erektil dhe gjithashtu të ndikojë në zvogëlimin e përmasave të ereksionit.
Për ata që nuk janë të njohur me termin, disfunksioni erektil (i njohur ndryshe si impotencë) është paaftësia e vazhdueshme për të arritur ose mbajtur një ereksion gjatë marrëdhënies seksuale. Shkaktarët mund të jenë të natyrës fizike apo psikologjike, por në çdo rast ekzistojnë trajtime të shumta.
Gjithsesi, më mirë është të parandalohet sesa të trajtohet.
Dhe një nga mënyrat më të mira për të ulur rrezikun është të lini duhanin.
Sipas një raporti të publikuar në “Healthline”, shumë studime ndër vite kanë treguar se meshkujt që pijnë duhan kanë një rrezik më të lartë për t’u prekur nga disfunksioni erektil sesa ata që nuk pijnë. Po ashtu, edhe vapingu është gjetur se ka efekte të ngjashme.
Edhe pse kjo gjendje haset më shpesh te meshkujt më në moshë, mund të ndodhë në çdo moshë, dhe sipas një studimi të publikuar në Journal of Sexual Medicine, 26% e meshkujve nën moshën 40 vjeç vuajnë nga kjo gjendje.
Por si ndikon konkretisht pirja e duhanit?
Ndryshe nga dëmet që i bën mushkërive, zemrës apo trurit, ndikimi që ka në ereksion flitet shumë më pak. Substancat kimike në cigare dëmtojnë enët e gjakut, përfshirë edhe ato që gjenden në penis.
“Ereksioni ndodh kur arteriet e penisit zmadhohen dhe mbushen me gjak, pas sinjaleve të dërguara nga truri. Por edhe nëse sistemi nervor funksionon mirë, ereksioni mund të mos ndodhë nëse enët e gjakut janë të dëmtuara nga duhani,” raporton Healthline.
Revista Verywell Health shton: “Pirja e duhanit ngushton enët e gjakut në gjithë trupin. Edhe nëse nuk ke probleme me ereksionin, ky ngushtim e vështirëson mbushjen e plotë të penisit me gjak, duke bërë që ereksionet të duken më të vogla.”
Pra, më pak gjak do të thotë ereksion më i dobët dhe më pak volum. Natyrisht, faktorë si shëndeti i përgjithshëm, mosha dhe gjendja psikologjike kanë gjithashtu ndikimin e tyre.
Por në fund të fundit, lënia e duhanit jo vetëm që përmirëson shëndetin në përgjithësi, por mund të “shpëtojë” edhe burrërinë tuaj.
