Eni Vasili është zgjedhur Drejtore e Përgjithshme e Radiotelevizionit Shqiptar (RTSH), pas një votimi të dytë të zhvilluar sot nga Këshilli Drejtues i këtij institucioni. Vasili mori 7 vota, duke siguruar shumicën e nevojshme për të marrë drejtimin e televizionit publik për një mandat 5-vjeçar.
Në garë ishin tre kandidatë: Eni Vasili, Xhoi Jakaj dhe Engjëll Musai. Në raundin e sotëm të votimit, Vasili mori 7 vota, Jakaj 3 dhe Musai 1.
Emërimi i saj është shoqëruar me akuza për shkelje ligjore dhe konflikt të pastër interesi. Sipas dokumentacionit të dorëzuar në kuadër të kandidimit, Vasili rezulton të jetë ende aksionere dhe administratore e kompanisë private “Open Media & Marketing Consulting”, që operon në fushën e reklamave dhe marketingut, që bie në kundërshtim të drejtpërdrejtë me ligjin “Për mediat audiovizive”.
Neni 104, pika 1/b e ligjit nr. 97/2013 ndalon qartë që kandidati për Drejtor të Përgjithshëm të RTSH-së të ketë interesa të drejtpërdrejta apo të tërthorta në kompani që veprojnë në fushën e medias ose reklamës, për të shmangur çdo konflikt interesi që cenon pavarësinë e institucionit publik.
Platforma e saj e paraqitur gjatë aplikimit është cilësuar nga kritikët si një përpjekje për të shndërruar televizionin publik në zgjatim të propagandës qeveritare, në kundërshtim me misionin e RTSH-së si një media e pavarur publike.
