Një ngjarje e rëndë është regjistruar mbrëmjen e kësaj të enjteje në fshatin Pllanë të Lezhës, ku një person është vrarë me armë zjarri.
Raportohet se viktima ka mbetur babai i Roan Brahimit, i njohur ndryshe si Sidorel Prendi, i cili u ekzekutua më 9 maj 2024 në lagjen Virona të Athinës.
Roan Brahimi, me pseudonimin “Sidi”, kishte mbërritur në Athinë nga Dubai dhe u qëllua për vdekje brenda automjetit të tij. Policia greke dyshon se vrasja e tij mund të jetë pjesë e një zinxhiri hakmarrjesh që kanë nisur në Shqipëri.
Brahimi ishte gjithashtu i njohur si rival i Ervis Martinajt, i quajtur “mbreti i kumarit”, i cili është zhdukur pa gjurmë që nga 8 gushti 2022 në aksin Durrës-Shijak, dhe fati i tij mbetet ende i panjohur.
Roan Brahimi dyshohet të jetë i implikuar edhe në vrasjen e Gentjan Bejtjes, e kryer më 15 mars në Larushk të Krujës.
Policia ndodhet në vendngjarje dhe ka nisur hetimet për zbardhjen e plotë të rrethanave.
