Një aksident i rëndë ka ndodhur pasditen e sotme rreth orës 16:55, në rrugën e Arbrit, në vendin e njohur si Shkalla e Tuajnit.
Dy automjete janë përplasur me njëri-tjetrin, ku për pasojë ka humbur jetën një 29-vjeçar me inicialet M. Sh. I lënduar ka mbetur pasagjeri që ndodhej në makinën e 29-vjeçarit, shtetasi me inicialet H. L., që ndodhet në spital nën kujdesin e mjekëve.
Lëndime ka marrë dhe shoferi i makinës tjetër, 35-vjeçari me inicialet O. N.
Nuk ka raportime mbi rrethanat e aksidentit, por përplasja ka shkaktuar trafik të rënduar në zonë.
Njoftimi i policisë:
Tiranë/Informacion paraprak
Rreth orës 16:55, në vendin e quajtur “Shkalla e Tujanit” automjeti me drejtues shtetasin O. N., rreth 35 vjeç është përplasur me automjetin me drejtues shtetasin M. Sh., rreth 29 vjeç.
Si pasojë ka humbur jetën 29-vjeçari, si dhe është dëmtuar pasagjeri po në këtë automjet shtetasi H. L., rreth 25 vjeç, i cili ndodhet në spital, nën kujdesin e mjekëve.
Grupi hetimor ndodhet në vendngjarje dhe po punon për sqarimin e rrethanave të aksidentit.
