Avionë luftarakë rusë janë pikasur pranë bregut të Alaskës, në një përshkallëzim shqetësues, kanë njoftuar zyrtarët ushtarakë amerikanë ditën e martë.
Komanda e Mbrojtjes Ajrore të Amerikës së Veriut (NORAD) konfirmoi se avionët rusë nuk kanë hyrë në hapësirën ajrore të SHBA-së apo Kanadasë, por janë futur në zonën e identifikimit të mbrojtjes ajrore (ADIZ), një zonë ndërkombëtare ku çdo avion duhet të identifikohet për arsye sigurie kombëtare.
Edhe pse nuk u bë e ditur se sa avionë ishin apo çfarë lloj avionësh ishin, ky zhvillim ndodh vetëm dy muaj pasi avionë luftarakë amerikanë u ngritën në ajër dy herë brenda tre ditësh për të ndjekur avionë ushtarakë rusë në të njëjtën zonë.
Në atë rast, Rusia dërgoi fillimisht dy bombardues dhe dy avionë luftarakë pranë Alaskës, dhe më pas dy ditë më vonë, dërgoi sërish dy avionë të tjerë si shenjë force.
Në një tjetër incident të ndodhur në shtator, një avion rus iu afrua rrezikshëm një avioni amerikan, dhe vetëm në sekondat e fundit shmangu përplasjen.
Zyrtarët amerikanë thonë se këto veprime janë pjesë e një qëndrimi gjithnjë e më agresiv të Rusisë ndaj SHBA-së. Megjithatë, sipas deklaratës së fundit të NORAD, avionët e kësaj jave nuk konsideroheshin si kërcënim.
“Prania e avionëve rusë në zonën ADIZ të Alaskës është e zakonshme,” thuhet në deklaratë. “Kjo zonë fillon aty ku mbaron hapësira sovrane dhe kërkon identifikim të menjëhershëm të çdo avioni për arsye sigurie kombëtare.”
NORAD thekson se përdor një rrjet të shtresuar mbrojtës që përfshin satelitë, radarë dhe avionë luftarakë për të identifikuar çdo rrezik dhe për të reaguar në mbrojtje të Amerikës së Veriut.
