Të dhëna të reja tronditëse kanë dalë në dritë nga hetimet për vrasjen brutale të 22-vjeçares shqiptare, Ilaria Sula, në Itali.
Sipas mediave italiane, ngjarja makabre ka ndodhur në banesën e të dyshuarit, Mark Antony Samson, në Via Homs 8, në lagjen afrikane të Romës, ku janë zbuluar sasi të konsiderueshme gjaku pothuajse në çdo dhomë të apartamentit.
Ekspertët e mjekësisë ligjore mendojnë se krimi ka ndodhur në mbrëmjen e 25 marsit, ndryshe nga çfarë ka pretenduar i dyshuari në dëshminë e tij, i cili deklaroi se vrasja ndodhi mëngjesin e 26 marsit.
Sipas raportit, Ilaria është goditur me thikë në qafë, duke shkaktuar humbje të madhe gjaku, gjurmë të së cilës janë gjetur në muret e korridorit, në dysheme dhe në objekte të ndryshme brenda banesës.
Me ndihmën e substancës luminol, hetuesit kanë zbuluar gjurmë gjaku të fshira në pllakën e dushit, lavamanët e banjës dhe kuzhinës, si dhe në mjetet e pastrimit – përfshirë furça dhe doreza.
Gjurmë janë gjetur edhe në një kuti kartoni të fshehur mbi një dollap.
Një njollë e madhe gjaku është zbuluar edhe në brendësi të derës së përparme të majtë të automjetit të Samsonit, ku janë gjetur gjithashtu tufë flokësh të gjatë që dyshohet se i përkasin viktimës.
Pavarësisht përpjekjeve për të pastruar vendin e krimit më 26 mars, gjurmët e gjakut nuk janë eliminuar plotësisht. Një faturë e sekuestruar nga një dyqan detergjentesh pranë banesës tregon për blerje produktesh pastrimi po atë ditë, duke forcuar dyshimet për një tentativë për të fshehur provat.
Trupi i pajetë i Ilarias u gjet më 2 prill në një shpat mali në Guadagnolo, Capranica Prenestina – disa ditë pas zhdukjes së saj.
Sipas hetimeve, ajo ka qëndruar për rreth 20 orë në banesën e Samsonit para se të transportohej dhe të fshihej në zonën malore.
Autoritetet italiane po hetojnë mundësinë që persona të tjerë të kenë ndihmuar në pastrimin dhe zhdukjen e provave.
Ndërkohë, hetimet po vazhdojnë me intensitet të lartë për zbardhjen e plotë të kësaj ngjarjeje që ka tronditur opinionin publik në Itali dhe në Shqipëri.
