Terminali lindor i autobusëve, i cili ndodhet në Sauk, përveç funksionit kryesor ofron edhe shërbime të tjera.
Një klub nate është brenda territorit të terminalit dhe në fundjavë turmat e të rinjve “gumëzhijnë” terminalin, parkimin dhe gjithë zonën.
Shumë prej tyre lëvizin me makina personale, ndërsa të tjerë kanë nevojë për shërbimin e taksive, që kohët e fundit po përballen me një problem serioz.
Ata kanë treguar për JOQ ALBANIA se gjatë fundjavës që klubi është i hapur, terminali dhe parkimi privatizohen nga rrjeti i taksive “Sky Taxi” në pronësi të ish-deputetit socialist Vladimir Kosta, pronar gjithashtu i “Sky Tower”.
Taksistë thonë se trau i terminalit hapet vetëm për taksitë e Kostës dhe rrjedhimisht e gjithë klientela u shkon atyre.
Sipas tyre kjo skemë është e padrejtë pasi gjatë ditës që ka më pak fluks lejohen të futen në terminal, ndërsa në fundjavë që klubi është i hapur s’lejohen as të afrohen deri te trau.
Ata kërkojnë masa të menjëhershme pasi klientët i telefonojnë për t’u larguar nga klubi, por duke qenë se taksitë e tyrenuk futen dot në terminal detyrohen të marrin Sky Taxi me tarifa të kripura edhe për distanca shumë të shkurta.
