Suedia ka shpallur një investim prej 100 milionë kronash (9.2 milionë euro) për të rinovuar bunkerët e mbrojtjes civile, pasi ka paralajmëruar qytetarët e saj që të përgatiten për rrezikun e luftës pas agresionit rus në Ukrainë.
Me 64,000 strehimore të shpërndara në të gjithë vendin, Suedia ka më shumë bunkerë se shumica e vendeve të tjera, me hapësirë për rreth 7 milionë njerëz, mbi dy të tretat e popullsisë së saj.
Por që nga anëtarësimi i Suedisë në NATO në mars 2024, Agjencia e Kontingjencave Civile (MSB) ka shtuar inspektimet e këtyre strehimoreve, disa prej të cilave mund të strehojnë mijëra persona njëherësh.
Bunkerët janë të dizajnuar për të ofruar mbrojtje kundër valëve goditëse dhe fragmenteve të bombave, shpërthimeve dhe nxehtësisë nga armët bërthamore, rënies radioaktive, gazrave nga armët kimike dhe atyre biologjike.
MSB njoftoi të hënën se ka nisur një projekt madhor për modernizimin e këtyre strehimoreve, një proces që pritet të zgjasë "dy deri në tre vjet". Një nga përmirësimet kryesore përfshin rinovimin e filtrave që mbrojnë banorët nga armët kimike dhe radiologjike.
Kryeministri Ulf Kristersson deklaroi në janar se "Suedia nuk është në luftë… por as në paqe".
Kjo lëvizje është një tjetër tregues se Europa po përgatitet për një konflikt të madh në vitet e ardhshme. Finlanda ka njoftuar se do të ndjekë vendet baltike dhe Poloninë në tërheqjen nga një traktat që ndalon minat kundër personelit.
Ndërkohë, Bashkimi Europian javën e kaluar këshilloi çdo familje në bllokun me 27 shtete të ketë gati një pako mbijetese për tre ditë, në rast lufte apo fatkeqësish natyrore. Një gjeneral i lartë gjerman paralajmëroi gjithashtu se vendi do të duhet të rikthejë rekrutimin e detyrueshëm për të garantuar mbrojtjen e tij.
Pas përfundimit të Luftës së Ftohtë, Suedia kishte ulur ndjeshëm shpenzimet ushtarake, por filloi t’i rrisë ato sërish kur Rusia aneksoi Krimenë në 2014. Në 2015, autoritetet suedeze reaktivizuan strategjinë e "mbrojtjes totale", e cila kombinon mbrojtjen ushtarake dhe civile.
