Detaje të reja janë zbardhur nga vrasja e 22-vjeçares shqiptare, Ilaria Sula, e cila u gjet e vdekur në një zonë pyjore pranë komunës së Polit, rreth 40 kilometra nga Roma. Krimi është kryer nga ish-i dashuri i saj, Mark Samson, një 23-vjeçar filipinas, i cili e ka pranuar krimin dhe është arrestuar.
Si ndodhi vrasja dhe tentativat për të fshehur krimin
Sipas hetimeve të autoriteteve italiane, Mark Samson, pas një periudhe të lidhjes me Ilarian, e ka goditur disa herë me thikë në apartamentin e tij në Via Homs, në lagjen Africano të Romës. Pas vrasjes, ai ka tentuar të fshehë trupin e saj dhe ka vazhduar të përdorë telefonin e Ilaries për të dërguar mesazhe dhe për të postuar në rrjetet sociale, duke krijuar idenë se ajo ishte ende gjallë.
Zbulimi i trupit dhe hetimet
Pas disa ditësh kërkimesh intensive, trupi i Ilaria Sula është gjetur mëngjesin e 28 marsit, i fshehur në një valixhe dhe i hedhur në fund të një gremine në një zonë pyjore pranë komunës së Polit. Hetuesit, duke përdorur tabulatet telefonike dhe analizat teknike, kanë arritur të zbulojnë përdorimin e telefonit të viktimës nga Samson dhe kanë zbuluar lidhjen e tij me krimin.
Dëshmia dhe dyshimet e nënës
Nëna e Ilaria Sula ka dhënë një dëshmi rrëqethëse për mediat italiane, duke treguar se ajo ndjeu diçka të pazakontë pas mesazheve që vrasësi dërgonte nga telefoni i viktimës. Ajo ka thënë se e kuptoi menjëherë se diçka nuk shkonte dhe së bashku me bashkëshortin vendosën të denoncojnë zhdukjen e saj.
Dëshmia e vëllait dhe takimi i fundit
“E pashë motrën time për herë të fundit të dielën më 23 mars, kur ajo erdhi në Terni. Ajo ishte e qetë dhe nuk më tregoi për asnjë problem. Kjo ishte hera e fundit që fola me të. Nuk jam i sigurt nëse ajo i ka shkruar mesazhet që kam marrë pas asaj dite.”
Kishte diçka që nuk shkonte te ai
" Fatkeqësisht e njoh, kemi qenë në shkollë bashkë. Gjithmonë kishte diçka që nuk shkonte me të ," tha një mik i Markut. “ Ai nuk meriton as edhe një grimë keqardhje, – shpjegoi ai, –ai nuk shkonte shumë mirë me mua dhe miqtë tanë të tjerë, nuk e kontrollonte sjelljen e tij”
Kush ishte Ilaria Sula?
Ilaria Sula ishte një studente nga Shqipëria, e regjistruar në Fakultetin e Shkencave Statistike në Universitetin Sapienza të Romës. Ajo jetonte në një apartament me shoqet e saj në lagjen San Lorenzo. Ilaria ishte një vajzë e qetë dhe e angazhuar në studimet e saj. Ajo kishte lindur dhe ishte rritur në Terni, ku familja e saj ende jeton.
Arrestimi i Mark Samson
Hetimet, të cilat u zhvilluan me shpejtësi, zbuluan që Mark Samson ishte autori i vrasjes dhe është arrestuar nga autoritetet italiane. Ai ka pranuar krimin, dhe detajet e tij për mënyrën e kryerjes së vrasjes kanë tronditur opinionin publik.
