Gëzime Sula, nëna e 22-vjeçares Ilaria Sula, që u masakrua me thikë nga ish-i dashuri filipinez në Romë, ka ndarë një histori të dhimbshme duke zbuluar se kishte dyshuar menjëherë që mesazhet që kishte marrë nga telefoni i së bijës, kur ajo u zhduk, nuk ishin shkruar nga vetë Ilaria.
Sipas saj, e bija e kishte zakon ta telefononte me video dhe kurrë nuk shkruante mesazhe të thjeshta.
"Menjëherë e kuptova se diçka nuk shkonte. Më pas fola me miqtë që jetonin me të dhe së bashku me bashkëshortin vendosëm të denoncojmë menjëherë zhdukjen e saj, falë edhe inspektorit Moreno Fernandez që më rekomandoi një mik nga Terni. E di që hetimet çuan menjëherë te djali me të cilin Ilaria kishte dalë në të kaluarën, por ne dimë pak për të”.
Trupi i pajetë i studentes që rezultonte e zhdukur që prej 25 marsit, është gjetur në një zonë të pyllëzuar pranë Bashkisë së Polit, duke gdhirë të mërkurën e 2 prillit. Ish-i dashuri, 23-vjeçari me origjinë filipinase, është arrestuar dhe akuzuar për vrasje dhe fshehje të kufomës.
I riu, Marc Samson , student i arkitekturës dhe punonjës i McDonald's, pasi ka rrëfyer krimin ka dërguar policinë në vendin e ngjarjes dhe zonën ku kishte fshehur trupin e shqiptares. Ai ka treguar se 22-vjeçaren e ka goditur disa herë me thikë në trup, në apartamentin ku jeton dhe më pas ka hequr qafe trupin duke mbyllur në një valixhe.
