Një denoncim ka mbërritur në redaksinë e JOQ Albania nga një zonjë e cila jeton dhe punon në Gjermani prej 26 vitesh. Ajo ka ndarë përvojën e saj të vështirë në përpjekjen për të rimarrë shtetësinë shqiptare, një proces që në vend që të lehtësohet, është shndërruar në një pengesë burokratike absurde.
Që nga data 2 korrik 2024, Gjermania ka ndryshuar ligjin duke lejuar dyshtetësinë. Për këtë arsye, shumë emigrantë shqiptarë, të cilët ishin detyruar të hiqnin dorë nga shtetësia shqiptare për të marrë atë gjermane, kanë nisur procedurat për rikthimin e saj. Por, siç tregon ajo, realiteti ka qenë shumë më i vështirë nga sa pritej.
Ajo ka ndjekur të gjithë hapat e kërkuar: ka marrë nga ambasada shqiptare në Berlin listën e dokumenteve të nevojshme, përfshirë certifikatën e lindjes, familjaren dhe dëshminë e penalitetit nga Shqipëria. Pasi i ka përkthyer në shqip dhe dorëzuar në ambasadë, i është thënë se gjithçka është në rregull dhe do të dërgohej në Shqipëri për shqyrtim.
"Por lumturia nuk zgjati shumë," – thotë ajo. Dokumentet e saj u kthyen mbrapsht nga Ministria e Brendshme me arsyetimin se duhet të dorëzojë certifikatën e lindjes dhe atë familjare nga Gjermania. Kjo kërkesë është absurde, pasi ajo nuk ka lindur në Gjermani dhe, për këtë arsye, gjendja civile gjermane nuk mund t’i lëshojë këto dokumente.
"Kam kontaktuar me Ministrinë e Brendshme shqiptare për t’u shpjeguar situatën. Përgjigjja që mora ishte: ‘Kështu është urdhri i qeverisë dhe e dimë që nuk jua japin atje’. Çfarë duhet të bëjmë unë dhe shumë të tjerë si unë, kur shteti shqiptar në vend që të na lehtësojë procedurat, vetëm i ndërlikon më shumë?"
Denoncuesja shpreh zhgënjimin e saj dhe hedh dyshime se e gjithë kjo është thjesht një “show” i qeverisë shqiptare për të krijuar idenë se emigrantët janë të mirëpritur, ndërkohë që në realitet u vendosen barriera të pajustifikueshme.
"I bëj thirrje kryeministrit ta rishikojë edhe një herë këtë ligj, i cili u nxor posaçërisht më 20 nëntor 2024, për të penguar ne emigrantët që të rimarrim shtetësinë shqiptare," – thotë ajo.
Ky rast ngre pikëpyetje serioze mbi qasjen e shtetit shqiptar ndaj emigrantëve, të cilët, pavarësisht kontributit të tyre të madh në ekonomi përmes dërgesave financiare, përballen me një trajtim të padrejtë kur duan të rifitojnë të drejtën e tyre themelore: shtetësinë shqiptare.
