Skandali i fundit i filetos së pulës me salmonelë ka tronditur opinionin publik dhe ka ngritur pyetje serioze mbi menaxhimin e sigurisë ushqimore nga institucionet përgjegjëse. Në qendër të kritikave ka përfunduar Ministrja e Bujqësisë dhe Zhvillimit Rural, Anila Denaj, e cila, pavarësisht presionit publik dhe skandalit në fjalë, nuk ka dhënë ende dorëheqjen. Po çfarë po pret? Një skandal më të madh, apo ndoshta një "ftesë zyrtare" për të ikur?
Rasti i fundit i skandalit të Mond Goxhës dhe kompanive të ij AMG FOOD e DIMAL INC ka zbuluar se në disa tregje dhe supermarketet e vendit janë shitur fileto pule të infektuara me bakterin e rrezikshëm salmonela, që mund të shkaktojë sëmundje serioze tek konsumatorët. Kjo tregoi qartazi dështimin e AKU në funksionin e saj primar, mbrojtjen e sigurisë ushqimore të konsumatorëve shqiptarë.
Deri më tani, Anila Denaj nuk ka pranuar asnjë lloj përgjegjësie për situatën, duke ia atribuar fajin institucioneve vartëse dhe operatorëve ekonomikë që nuk kanë zbatuar rregullat e sigurisë ushqimore. Me sa duket, "të tjerët" janë gjithmonë fajtorët, por kurrë ajo vetë.
Qytetarët janë lodhur nga të njëjtat skema – skandale që shpërthejnë, zhurmë në media për disa ditë dhe më pas heshtje totale. A duhet që çdo krizë të përfundojë me ndonjë tragjedi për të pasur ndonjë reagim real nga qeveria? Apo ministrja mendon se edhe ky rast do të kalojë pa pasoja, siç ka ndodhur shpeshherë në të shkuarën?
Qytetarët me të drejtë pyesin: Pse nuk ka dhënë ende dorëheqjen Denaj? Apo po pret që skandali të harrohet si të tjerët?
Në vend që të marrë përgjegjësinë dhe të japë një mesazh të qartë për standardet e sigurisë ushqimore, Denaj vazhdon të qëndrojë në detyrë sikur asgjë nuk ka ndodhur. Ose ndoshta po pret që pulat të dalin vetë në konferencë shtypi dhe të deklarojnë: “Na falni që ishim të infektuara!”
