Një denoncim shqetësues ka mbërritur në redaksinë e JOQ Albania nga një qytetar që jeton në një pallat në Kodër Babrru.
Sipas tij, banorët e pallatit kanë blerë apartamentet e tyre me premtimin se do të kishin parkim të garantuar.
Megjithatë, pronari i objektit, shtetasi Arben R., jo vetëm që nuk po i lejon të parkojnë, por edhe ka bllokuar hapësirat e parkimit.
Banorët, të cilët prej dy vitesh banojnë në këtë pallat, janë përballur me një situatë absurde. Kur kanë marrë dokumentacionet e apartamenteve, u është thënë se parkimi u takonte atyre. Por sot, ai është bllokuar nga vetë pronari, duke i lënë pa mundësi parkimi dhe duke u krijuar vështirësi të mëdha në përditshmëri.
“Kemi dy vite që banojmë këtu dhe pronari na ka thënë se parkimi është i yni. Tani e ka zënë vendin dhe nuk na lejon të parkojmë. Nuk mund të shkarkojmë as materialet në shtëpi. Ju lutem publikoje se nuk po gjejmë zgjidhje,” – shkruan qytetari në mesazhin e tij.
Në videon e siguruar nga redaksia, duket qartë se si pronari ka bllokuar hapësirat e parkimit, duke u mohuar banorëve një të drejtë që fillimisht u ishte premtuar.
