Një denoncim i mbërritur së fundmi në redaksinë e JOQ Albania vjen nga qyteti i Durrësit, ku banorët e lagjes 13 shprehin indinjatën e tyre për gjendjen e mjerueshme të infrastrukturës rrugore.
Një qytetare nga Durrësi, e cila flet në emër të të gjithë lagjes së saj, ka dërguar një video që dokumenton gjendjen katastrofike të rrugës "Martin Canaj". Sipas saj, rruga është e mbushur me gropa të mëdha në të dyja anët, duke e bërë të pamundur ngjitjen e makinave në kodrinën e vogël pa manovra të vështira. Banorët raportojnë shpesh për goma të çara dhe makina që ngecin në mes të rrugës për shkak të gropave të shumta.
"Vijmë dhe kërkojnë votat me premtim për rregullim rruge, u bë kohë kjo histori me vite me radhë," shkruan e revoltuar qytetarja, duke e lidhur neglizhencën e Bashkisë me fushatat elektorale. Ajo përmend emrin e kryetares së Bashkisë së Durrësit, Emirjana Sako, duke theksuar se pavarësisht premtimeve, asnjë investim nuk është bërë për rrugën e tyre.
Banorët tregojnë se kanë pyetur vazhdimisht në Bashkinë e Durrësit për fatin e rrugës së tyre. Fillimisht, u ishte premtuar një rregullim në janar, më pas afati u shty për në mars. Ndërkohë, ata kanë vënë re se rruga tek një karburant aty pranë, që shërben vetëm për dy familje, është rregulluar, ndërsa rruga e tyre e përbashkët për mbi 20 familje, jo. Përgjigja e fundit nga Bashkia ka qenë dekurajuese: "Mos e mendoni fare se rruga juaj nuk është fare në listë."
Përveç problemeve me automjetet, banorët e lagjes 13 në Durrës përballen edhe me vështirësi në lëvizjen në këmbë, sidomos gjatë ditëve me shi, kur rruga mbushet me ujë dhe baltë. Ata theksojnë se rruga është lënë pas dore për më shumë se 5 vite.
"Nuk vendos më dorë bashkia, po tallet me ne," shprehet qytetarja, duke kërkuar që videoja të bëhet publike në mënyrë që të shihet realiteti i qytetit të Durrësit dhe tallja që bën Bashkia me popullin e saj. Denoncimi mbyllet me një notë kritike ndaj deputetëve, të cilët sipas saj, shfaqen vetëm në kohë fushate për të kërkuar vota dhe më pas zhduken.
