Në Shqipëri, skandalet nuk njohin kufij. Teksa Altin Hajri, një nga emrat e njohur të botës së krimit në Shijak, është në kërkim nga SPAK për një sërë ngjarjesh kriminale, qeveria ka gjetur një mënyrë tjetër për t’u treguar bujare: i ka dhënë gruas së tij leje për ndërtimin e një pallati 18-katësh në Durrës.
Në mbledhjen e 26 marsit 2025, Këshilli Kombëtar i Territorit dhe Ujit, i drejtuar nga kryeministri ose, në mungesë të tij, zv.kryeministrja Belinda Balluku, ka miratuar lejen për ndërtimin e një “Godine banimi dhe shërbimi me 18 kate mbi tokë dhe 3 kate nëntokë” në qytetin bregdetar. Subjekti zhvillues është firma "Pjeza 2022", e cila rezulton të jetë në pronësi të Valentina Hajrit, bashkëshortes së Altin Hajrit.
Altin Hajri nuk është një emër i panjohur për drejtësinë. Ai ka qenë i akuzuar për rrëmbimin dhe vrasjen e Jani Prengës në janar të vitit 2020 dhe fillimisht u dënua me 7 vite burg, por më pas Apeli e shpalli të pafajshëm. Përveç kësaj, ai ka qenë i hetuar dhe arrestuar për trafik heroine dhe aktivitete të tjera kriminale, por gjithmonë ka arritur t’i shpëtojë ndëshkimit.
Sipas raportimeve mediatike, Hajri dyshohet se është mbrojtur nga ish-deputeti i PS-së Ergys Çyrbja, i cili madje e ka strehuar në shtëpinë e tij gjatë kohës që kërkohej nga policia.
Ndërkohë, në janar të vitit 2025, firma e bashkëshortes së tij, "Pjeza 2022", pezulloi aktivitetin e saj pa një afat të përcaktuar. Megjithatë, vetëm dy muaj më vonë, KKT-ja miratoi një leje ndërtimi për një pallat shumëkatësh për të njëjtën kompani, pavarësisht se pronari i saj rezulton të jetë në kërkim nga drejtësia.
Resorti i njohur “Golden”, i lidhur me Hajrin, u sekuestrua nga OFL, por më pas gjykata ia hoqi sekuestron, duke ia kthyer familjes së tij. Emri i tij është përmendur shpesh në raportet e policisë dhe SPAK-ut, por pavarësisht kësaj, qeveria vijon të lejojë zhvillimin e biznesit të familjes së tij.
Ky rast shton edhe një herë dyshimet se në Shqipëri, ligji vlen vetëm për të dobëtit, ndërsa ata me lidhjet e duhura jo vetëm që i shpëtojnë drejtësisë, por edhe marrin leje për pallate në mes të qytetit.
