Një qytetare ka denoncuar kushtet e mjerueshme në maternitetin e Pogradecit përmes një mesazhi dërguar redaksisë së JOQ Albania.
Pamjet dhe përshkrimi i situatës tregojnë një realitet tronditës: mure të mbuluara me myk dhe lagështirë, ngrohje vetëm me batanije dhe papastërti e madhe kudo ku hedh sytë.
Ajo thotë se këto ambiente nuk duhet të quhen kurrsesi maternitet apo spital pasi as kushtet më minimale bazë nuk janë të garantuara.
Nëpërmjet këtij denoncimi ajo ngre një shqetësim të madh për gjendjen e sistemit shëndetësor në Shqipëri, që duket se është në kontrast të plotë me imazhin e shëndetësisë moderne që promovon qeveria përmes rrjeteve sociale. Kjo situatë tregon se, pavarësisht propagandës për përmirësime dhe investime, shumë qytetarë përballen me kushte të papranueshme dhe me mungesë të kujdesit të duhur shëndetësor, veçanërisht për nënat dhe foshnjat, të cilët janë më vulnerabël.
Një situatë e tillë, ku mungon ngrohja dhe ku kushtet për shëndetin janë të pasigurta, tregon nevojën emergjente për vëmendje dhe reagim nga institucionet përkatëse. Gjithashtu ky denoncim shërben edhe si thirrje për transparencë dhe për llogaridhënie nga ana e autoriteteve, që të shpjegojnë pse shqiptarët përballen ende me probleme të tilla në një kohë që buxheti i shtetit për shëndetësinë sa vjen e rritet nga viti në vit.
Shqiptarët duke qenë taksapagues të rregullt, si gjithë të tjerët, meritojnë një sistem shëndetësor që vërtet i shërben atyre dhe jo një fasadë që ekziston vetëm për të mbuluar dështimet.
Denoncimi i qytetares:
Pershendetje JOQ rastesishte kam shkuar ne martenitetin e Pogradecit pasi kisha nje te aferme edhe u hasa me keto pamje qe se besoj se quhet spital nese doni ta postoni gjithemon anonim .
