Mbi 500 njerëz të prejardhjeve të ndryshme kulturore dhe sociale u mblodhën në Kishën e Shën Gjonit në Molenbeek, Belgjikë, të dielën për një iftar të përbashkët, si pjesë e përpjekjeve të komunës për të u shpallur Kryeqyteti i Kulturës Evropiane në vitin 2030.
Aktiviteti, i cili përkon me muajin e shenjtë të Ramazanit dhe kremtimin e Kreshmës për të krishterët, bashkoi komunitetet myslimane dhe të krishtera në një shenjë solidariteti dhe harmonie.
Ky iftar i organizuar nga iniciativa Molenbeek Për Bruksel 2030, në bashkëpunim me shoqatat lokale dhe banorët e Molenbeek, synonte të theksonte vlerat e solidaritetit dhe bujarisë të cilat janë thellësisht të rrënjosura në identitetin e komunitetit. Aktiviteti shërbeu për të festuar përpjekjet e qytetit për t'u kandiduar si Kryeqyteti i Kulturës Evropiane, duke nxjerrë në pah vlerat që lidhen me Sadakën, një element kulturor i rëndësishëm në shumë kultura dhe besime.
Gjatë aktivitetit, pjesëmarrësit shijuan ushqime të përgatitura nga komuniteti lokal, duke përfshirë ushqime të nxehta, ëmbëlsira dhe pije, shumë prej të cilave ishin dhurata nga pjesëmarrësit. Përveç ushqimit, gjatë iftarit u luajt muzikë nga anëtarët e komunitetit mysliman dhe të krishterë të Molenbeek.
Kjo ngjarje vjen dhjetë vjet pas sulmeve tragjike në Paris dhe nëntë vjet pas atyre në Bruksel, duke theksuar angazhimin e Molenbeek për të tejkaluar stigmën që ka rrethuar disa pjesë të komunitetit të tij dhe për të afirmuar pasurinë e diversitetit të tij kulturor.
