Ministria e Shëndetësisë në Gaza njoftoi të dielën se numri i palestinezëve të vrarë nga lufta mes Izraelit dhe Hamasit ka shkuar në mbi 50 mijë. Sulmet e fundit izraelite shkaktuan të paktën 26 viktima gjatë natës.
Ushtria izraelite deklaroi se ka “eliminuar” dhjetëra militantë që nga përfundimi i armëpushimit javën e kaluar, i cili u thye nga një valë sulmesh ajrore që morën qindra jetë.
Ndërkohë, tensionet në Izrael po rriten, me protesta kundër kryeministrit Benjamin Netanyahu. Qeveria e tij votoi për të shprehur mosbesim ndaj Prokurores së Përgjithshme, e cila shihet si një pengesë për fuqinë e koalicionit qeverisës.
Ushtria izraelite urdhëroi mijëra palestinezë të largohen nga lagjja Tel al-Sultan në qytetin jugor të Rafahut. Banorët u detyruan të lëvizin drejt Muwasi, një zonë me kampe të mbipopulluara. Më shumë se 2 milionë njerëz janë zhvendosur brenda Gazës, shumë prej tyre disa herë.
“Është zhvendosje nën zjarr,” tha gazetari Mustafa Gaber, i cili u largua me familjen.
Një tjetër palestineze, Amal Nassar, tha: “Predhat bien mes nesh, plumbat fluturojnë mbi kokat tona. Të moshuarit janë lënë në rrugë.”
Ndërkohë, Gjysmëhëna e Kuqe Palestinëse humbi kontaktin me një ekip mjekësor që po i përgjigjej një sulmi në Rafah. Ushtria izraelite pranoi se kishte qëlluar mbi disa “mjete të dyshimta”, të cilat më vonë rezultuan të ishin ambulanca dhe mjete zjarrfikëse.
Në qytetin e Gazës, një shpërthim ndodhi pranë një kampi të zhvendosurish. “Burri im është i verbër dhe filloi të vraponte zbathur. Fëmijët tanë vraponin të tmerruar,” tha dëshmitarja Nidaa Hassuna.
Izraeli thotë se shënjestron vetëm militantët, por viktimat civile po rriten.
Sipas Ministrisë së Shëndetësisë në Gaza, që nga e marta, kur bombardimet izraelite thyen armëpushimin, janë vrarë 673 persona. Në total, 50,021 palestinezë janë vrarë që nga fillimi i luftës, mes tyre 15,613 fëmijë dhe 872 foshnja nën 1 vjeç.
Izraeli pretendon se ka vrarë rreth 20 mijë luftëtarë të Hamasit, por nuk ka ofruar prova për këtë shifër.
Në anën tjetër, kabineti izraelit miratoi ndërtimin e 13 vendbanimeve të reja në Bregun Perëndimor, të cilat sipas shumicës së bashkësisë ndërkombëtare, janë të paligjshme.
