Pas denoncimit të publikuar nga JOQ Albania mbi parakalimin e rrezikshëm të një automjeti policie brenda Tunelit të Murrizit, Policia e Shtetit ka reaguar duke marrë masa ndaj punonjësve të përfshirë.
Sipas njoftimit zyrtar, shoferi i automjetit, inspektor A.S., është identifikuar dhe është ndëshkuar me një gjobë prej 40,000 lekësh të rinj, ndërsa i janë zbritur 15 pikë nga patenta.
Gjithashtu, Drejtori i Përgjithshëm i Policisë ka urdhëruar nisjen e një hetimi disiplinor për drejtuesin e mjetit dhe për shefin e Komisariatit të Policisë Mat, Kryekomisar E.S., i cili ndodhej në automjetin që kreu shkeljen.
Ata do të hetohen për shkelje të rëndë që cenon figurën e punonjësit të policisë dhe për keqpërdorim të kompetencave policore.
