Pas përfundimit të kontratës 12-vjeçare me qeverinë shqiptare, SICPA, koncesionari i i pullave fiskale, rikthehet në Shqipëri si partner në një shoqëri shqiptaro-arabe për prodhimin dhe shpërndarjen e pullave fiskale. Kompania ALBTrace CO është krijuar me kapital të përbashkët, ku 51% e aksioneve janë në duar të "Shtypshkronja e Letrave me Vlerë" dhe 49% i takojnë kompanisë O&S Security and Solutions LLP, e cila është e lidhur me SICPA. Por, megjithëse kompania është themeluar, prodhimi i pullave fiskale ende nuk ka nisur, duke i lënë bizneset që operojnë me mallra akcize në një ngërç të madh.
Pas skadimit të kontratës me SICPA më 1 janar 2025, shumë biznese, përfshirë ato që merren me importin e pijeve alkoolike, janë përballur falimentimin, pasi mallrat e tyre janë bllokuar për më shumë se dy muaj në doganë për shkak të mungesës së pullave fiskale. Bizneset kanë ngritur shqetësime të mëdha, ndërsa Drejtoria e Akcizave ka njoftuar se autoritetet doganore po presin udhëzime nga "Shtypshkronja e Letrave me Vlerë", por ende nuk ka një datë të caktuar për nisjen e prodhimit të pullave.
Për të zgjidhur këtë krizë, autoritetet shqiptare duhet të ndërmarrin masa urgjente dhe të ofrojnë një datë të saktë për nisjen e prodhimit të pullave fiskale. Kjo është thelbësore për të shmangur evazionin fiskal dhe kontrabandën e mallrave, si dhe për të rikthyer normalitetin në treg. Nëse nuk merret një veprim i shpejtë, kjo situatë do të vazhdojë të dëmtojë bizneset.
