Çdo vit, gjetja e një plazhi publik në bregdetin shqiptar bëhet gjithnjë e më e vështirë, pasi pjesa më e madhe e vijës bregdetare po kalon në duart e privatëve. Këta të fundit shfrytëzojnë hapësirat për të vendosur shezlongë, duke paguar tarifa ndaj Ministrisë së Turizmit.
Të dhënat zyrtare tregojnë se gjatë tre viteve të fundit, sipërfaqja e plazheve të dhëna me kontratë për subjekte private është rritur ndjeshëm. Gjatë periudhës 2022-2024, ky proces ka marrë hov, duke kufizuar gjithnjë e më shumë hapësirat e lira për qytetarët.
Në vitin 2024, vetëm në Bashkinë Lezhë, sipërfaqja e plazheve private arriti në 74,106 m², nga 20,969 m² që ishte në vitin 2022 – një rritje prej 253%. Tendencë e ngjashme është vërejtur edhe në bashkitë e tjera ku plazhet private zënë sipërfaqe të konsiderueshme:
Në total, në këto gjashtë bashki, sipërfaqja e plazheve private është zgjeruar me 132% në tre vite, nga 239,221 m² në vitin 2022 në 554,738 m² në vitin 2024. Bashkia Lezhë mban rekordin për rritjen më të lartë të privatizimit të plazheve, duke kufizuar ndjeshëm mundësinë e qytetarëve për të pushuar falas.
Në të gjithë vendin, numri i shezlongëve për vitin 2024 përllogaritet në 105 mijë, por pavarësisht pagesave që qytetarët detyrohen të bëjnë, shumë plazhe private nuk ofrojnë kushte të përshtatshme.
Mungesa e hapësirës për shkak të shezlongëve të vendosur shumë pranë njëri-tjetrit, muzika e lartë nga lokalet dhe hotelet, si dhe ndalimi i ushqimeve të sjella nga pushuesit i shprehur përmes tabelës së famshme "Ndalohet Termusi", janë disa nga problemet më të mëdha që shqetësojnë pushuesit gjatë sezonit veror.
