Një zjarr ka përfshirë pasditen e sotme një apartament në katin e tretë të një pallati në lagjen “18 Shtatori” në Gjirokastër, me dyshimet e para që lidhen me një shkëndijë elektrike si shkak të mundshëm të flakëve.
Zjarrfikësit kanë ndërhyrë menjëherë për të shuar zjarrin dhe për të siguruar zonën, ndërsa banorët e pallatit janë evakuuar për siguri. Fatmirësisht, nuk raportohet për persona të lënduar apo të prekur nga tymi, ndërsa dëmet janë vetëm materiale.
Për të shmangur rreziqe të mëtejshme, furnizimi me energji elektrike në zonë është ndërprerë përkohësisht. Autoritetet vijojnë hetimet për të zbuluar shkaqet e plota të ngjarjes.
