Ish-kreu i "Bandës së Durrësit", Lulzim Berisha, është ekstraduar nga Spanja në Shqipëri mbrëmjen e 18 marsit, nën masa të rrepta sigurie. Sipas burimeve, ai ka mbërritur në aeroportin "Nënë Tereza" pas një operacioni të realizuar nga Interpol Madridi në bashkëpunim me autoritetet shqiptare.
Gjykata Kombëtare e Spanjës vendosi pranimin e kërkesës së Shqipërisë për ekstradimin e Berishës, pavarësisht kundërshtimit të tij me pretendimin se jeta e tij do të ishte në rrezik në vendin e origjinës.
Me ekstradimin e tij në Shqipëri, Berisha pritet të përballet me drejtësinë, ku akuzohet për vrasjen e Klodian Saliut.
Kush është Lulzim Berisha?
Lulzim Berisha është një emër i njohur në botën e krimit në Shqipëri. Ai konsiderohet si truri i "Bandës së Durrësit". Ky grup i rrezikshëm kriminal ka vepruar nga fundi i viteve ’90 dhe fillimi i viteve 2000 dhe është përgjegjës për një seri vrasjesh dhe veprimtarish kriminale që kanë tronditur vendin për vite me rradhë.
Historiku i krimeve të Bandës së Durrësit:
17 tetor 1998 – Vrasja e parë e dokumentuar, ku u ekzekutua Dritan Sallaku në Durrës nga anëtarët e bandës.
29 tetor 1998 – Ekzekutimi i Viron Currit dhe Arjan Pajës, si dhe plagosja e Marsel Sotirit.
22 gusht 1999 – Marsel Sotiri, i mbijetuari i atentatit të mëparshëm, ekzekutohet në një pritë në lagjen Plazh të Durrësit.
9 korrik 2000 – Banda kryen një tjetër atentat ku vritet Dritan Disha në Shënavlash.
14 janar 2002 – Ekzekutimi i Ervin Lames në lagjen nr. 3 të Durrësit.
2003 – Konflikte të brendshme brenda grupit çojnë në ndarjen e organizatës në dy fraksione rivale: një të drejtuar nga Lulzim Berisha dhe tjetrën nga Klodian Saliu.
26 shkurt 2005 – Organizata e Berishës hakmerret ndaj rivalëve duke vrarë Klodian Saliun pranë Maminasit.
13 tetor 2005 – Ish-fraksioni i Saliut, tani nën drejtimin e Indrit Dokles, hakmerret duke vrarë Avni Gashin, trupi i të cilit u gjet në Romanat, Durrës.
30 tetor 2005 – Grupi i Indrit Dokles kryen një tjetër vrasje, duke eliminuar Ilir Kolgjinin pranë stadiumit "Qemal Stafa" në Tiranë.
