Në një ngjarje tronditëse që ka shokuar Maqedoninë e Veriut, familjarët e viktimave që humbën jetën pas zjarrit në një diskotekë në Koçan, kanë refuzuar që trupat e të ndjerëve t’i nënshtrohen autopsisë. Ata kanë bllokuar hyrje-daljet e spitalit kryesor në qytet për të parandaluar heqjen e trupave të të dashurve të tyre, të cilët duhet të dërgohen për obduksion. Familjarët, të cilët janë shprehur me dhimbje dhe zemërim, kanë bllokuar rrugën me makina, duke kërkuar që fëmijët e tyre të mos preken për së dyti.
“Duhet të na vrisni ne që të bëni autopsi fëmijët tanë. Nuk mund ti vrisni për herë të dytë,” kanë thënë ata ndërsa shprehin dhimbjen e thellë për humbjen tragjike të fëmijëve të tyre.
Ndërkohë, miqtë dhe të afërmit e të plagosurve nga zjarri po presin jashtë spitalit në Shkup për të marrë lajme mbi gjendjen e tyre. Një nga të afërmit e të plagosurve, Simeon Sokolov, ka ndarë shqetësimin e tij për vajzën Anastasija, e cila po trajtohet për djegie. Sokolov ka shprehur shpresën se ajo do të mbijetojë dhe do të shërohet, ndërsa ka theksuar se është një moment i rëndë dhe se shumë të rinj po vuajnë pas tragjedisë.
Zjarri tragjik shpërtheu në diskotekën 'Pulse' në Koçan, ku çatia mori flakë nga një ekspozitë piroteknike. Si pasojë, të paktën 59 të rinj humbën jetën dhe 160 të tjerë u lënduan. Nga ata që u plagosën, 27 janë shtruar në spitalin e Shkupit me djegie të rënda, ndërsa 23 të tjerë janë duke marrë trajtim në Qendrën Klinike. Mes të plagosurve janë edhe të mitur.
Ministri i Shëndetësisë, Arben Taravari, ka njoftuar se 18 persona janë në gjendje kritike. Kryeministri Hristijan Mickoski e ka cilësuar këtë një ditë të vështirë dhe shumë të trishtueshme për Maqedoninë, duke e përshkruar humbjen e kaq shumë jetëve të reja si një dhimbje të pamatshme për familjet dhe të afërmit.
Kjo ngjarje tragjike ka çuar Maqedoninë në një javë zie kombëtare, ku qytetarët dhe autoritetet e vendit po shprehin ngushëllime dhe solidaritet për viktimat dhe të plagosurit.
