Tragjedia e ndodhur në Koçan, Maqedoni e Veriut, ku shpërthimi i zjarrit në diskotekën “Pulse” ka lënë të paktën 51 viktima dhe mbi 100 të lënduar, i ka tronditur te gjithë.
Familjarët e të rinjve që ndodheshin në klub po postojnë foto dhe numra celularësh në rrjetet sociale për të ndihmuar në identifikimin e të plagosurve dhe viktimave. Ata shpresojnë të gjejnë informacion se në cilin spital janë dërguar të lënduarit dhe nëse ata janë të gjallë.
Ministri i Brendshëm, Pançe Toshkovski, ka konfirmuar se të lënduarit janë dërguar në spitalet e Shkupit dhe Shtipit, ndërsa ekipet mjekësore janë angazhuar për shpëtimin e të plagosurve. Pjesë e operacionit shpëtues ishte dhe përdorimi i një helikopteri të Ministrisë së Brendshme.
"Zjarri shpërtheu nga fishekzjarret, të cilat goditën tavanin e ndërtuar nga material shumë të ndezshëm. Flakët u përhapën shpejt dhe tymi i dendur shkaktoi viktima", tha Toshkovski.
Ai gjithashtu theksoi se autoritetet janë duke bashkëpunuar me Prokurorinë dhe organet tjera për zbardhjen e shkaqeve të kësaj tragjedie dhe për të ndëshkuar ata që janë përgjegjës.
Kjo ngjarje ka tronditur komunitetin e Koçanit dhe familjarët e të prekurve janë duke kërkuar me urgjencë informacion për fatin e të dashurve të tyre.
