Në një tragjedi të madhe që ndodhi në Koçan, Maqedoni e Veriut, janë regjistruar 51 viktima dhe më shumë se 100 persona të lënduar, pas një shpërthimi zjarri në një klub nate.
Zjarri ka shpërthyer nga përdorimi i mjeteve piroteknike, të cilat ishin përdorur gjatë performancës.
Ministri i Brendshëm, Pançe Toshkovski, ka njoftuar se të lënduarit janë dërguar për kurim në spitalet e Shtipit dhe Shkupit, ndërsa disa prej tyre janë transportuar me helikopter për trajtim urgjent. Ai gjithashtu ka njoftuar se trupat e viktimave do të dërgohen në Shkup për autopsi për të përcaktuar shkakun e vdekjes.
"Jemi duke bashkëpunuar ngushtë me Prokurorinë Publike dhe organet e tjera për zbardhjen e plotë të tragjedisë. Do të sigurojmë që përgjegjësit, përfshirë organizatorët e ngjarjes, të përballen me organet e drejtësisë," tha Toshkovski. Ai theksoi se gjithkush duhet të mbajë përgjegjësi morale për këtë ngjarje të tmerrshme.
Kjo ngjarje ka lënë pas një dhimbje të madhe në komunitetin e Koçanit, dhe autoritetet janë duke punuar për të hetuar shkaqet dhe rrethanat.
