4 persona janë arrestuar nga policia e Tiranës pasi vodhën me dhunë një shumë parash dhe celularë, në një banesë të marrë me qira nga 3 shtetase të huaja.
Por në pranga u vu dhe njëra nga vajzat turke pasi posedonte një sasi lënde narkotike kanabis, që u gjet në këtë banesë.
2 shtetaset e tjera nga Turqia gjithashtu u proceduan për moskallëzim krimi.
Policia tha se kishte arrestuar me sukses autorët e dyshuar të vjedhjes nga 18 deri në 20 vjeç, të cilëve iu sekuestruan 3350 euro, lëndë narkotike, një armë e ftohtë, automjeti i përdorur gjatë vjedhjes dhe 4 celularë.
Policia nuk njoftonte mbi rrethanat e plota të vjedhjes, por deklaronte:
“Shërbimet e Komisariatit të Policisë Nr. 4, pas marrjes së njoftimit për vjedhjen e një shume parash dhe 2 celularëve në një banesë të marrë me qira nga 3 shtetase turke, kanë organizuar operacionin policor të koduar ‘Brothers’, me qëllim identifikimin dhe arrestimin e autorëve të dyshuar të vjedhjes.
Si rezultat i operacionit u arrestuan shtetasit:
-S. Z., 20 vjeç dhe O. Z., 18 vjeç (vëllezër); Xh. S., 20 vjeç dhe S. S., 18 vjeç (vëllezër).
Këta shtetas, në bashkëpunim me njëri-tjetrin, kanë vjedhur me dhunë një shumë parash dhe 2 celularë, në banesën e marrë me qira nga 3 shtetaset turke.
Në vijim të veprimeve u bë dhe arrestimi i shtetases turke M. M., 24 vjeçe, pasi gjatë kontrollit të banesën e marrë me qira, u gjet dhe u sekuestrua një sasi lënde narkotike kanabis.
Gjithashtu, u proceduan në gjendje të lirë 2 shtetaset e tjera turke, për moskallëzim krimi.
Materialet procedurale iu referuan Prokurorisë së Tiranës, për veprime të mëtejshme.”
