Media italiane 'Il Messaggero' i ka kushtuar një artikull fenomenit shqetësues të shqiptarëve që hyjnë në Itali si turistë, por në të vërtetë janë pjesë e rrjeteve të trafikut të drogës. Ky fenomen po kthehet në një problem serioz për vendin fqinj, pasi këta trafikantë operojnë me metoda gjithnjë e më të sofistikuara, duke shpërndarë kokainë në qytete të ndryshme italiane.
Shqiptarët e përfshirë në këtë aktivitet kriminal nuk njohin qytetet ku dërgohen dhe nuk flasin asnjë fjalë italisht, por kanë një njohuri të përkryer mbi emrat dhe adresat e klientëve të tyre. Punëdhënësit e tyre kujdesen që ata të kenë një agjendë të detajuar me të dhënat e atyre që do të blejnë drogën, duke ua lehtësuar kështu punën.
Këta trafikantë të rinj përdorin Google Maps për të lëvizur në qytet dhe shpërndajnë kokainën sipas listave të përgatitura nga organizata që i rekruton. Ata paguhen shumë pak nga bosët e drogës, të cilët menaxhojnë tregun e shpërndarjes dhe e kanë ndërtuar rrjetin e tyre në mënyrë perfekte.
Ata zakonisht janë pa precedentë penalë të mëparshëm dhe qëndrojnë në qytet vetëm për disa ditë. Nëse kapen, për shkak se janë të pastër penalisht, rrezikojnë vetëm ndalimin e rikthimit në Itali. Por organizatat kriminale i zëvendësojnë ata menjëherë me të tjerë, gati për të mbushur tregun lokal me kokainë duke u përpjekur të mbeten 'të padukshëm'.
Policia italiane ka arrestuar mbi 20 të tillë vetëm këtë vit, por numri i atyre që kanë arritur të kthehen në Shqipëri pas përfundimit të "misionit" të tyre mbetet i panjohur. Të gjithë të arrestuarit kishin hyrë në Itali si turistë dhe nuk kishin precedentë penalë.
Këta trafikantë akomodohen në hotele ose shtëpi me qira, në qendër apo periferi, dhe përdorin makina me qira për të lëvizur. Hetuesit kanë sekuestruar në disa raste blloqe shënimesh ku janë regjistruar emrat dhe adresat e klientëve.
Ky trend alarmues po bëhet një problem serioz për autoritetet italiane, të cilat po përpiqen të çmontojnë këtë rrjet të sofistikuar të trafikut të drogës që shfrytëzon lehtësitë e hyrjes në vend si turist.
