Shtatë persona, gjashtë anëtarë dhe drejtuesi i grupit, mendohet se kanë vjedhur sende me vlerë deri në 1 milion euro, për t’i shitur më pas në Shqipëri kundrejt shumave të ndryshme monetare.
Grupi kriminal shqiptar besohet se ka kryer vjedhje në banesat e 49 personazheve të njohur botës së futbollit, Formula 1, artit e muzikës, por është kapur nga Policia franceze gjatë një aksioni policor.
Të ndaluarit vodhën banesat e 49 personazheve VIP si futbollistë, pilotë të Formula Uno dhe këngëtarë të famshëm në Francë, Belgjikë e Luksemburg.
Në kuadër të operacionit janë arrestuar shtatë persona. Dy të parët u arrestuan më 20 janar në Luksemburg, ndërsa pesë të tjerët u kapën më 4 mars pranë Reims. Midis tyre ishte drejtuesi i dyshuar i rrjetit, Edison Pula, një shqiptar rreth të tridhjetave.
Ky i fundit, i kërkuar nga Interpol, njihej për aktivitetin e gjatë kriminal dhe për shmangien nga dënimi, duke përfshirë dhe arratisjen nga një burg italian në qershor 2022.
Francezët grupin e hajdutëve e kanë “pagëzuar” me emrin “Nikla”, duke e cilësuar goditjen si një nga operacionet më të rëndësishme kundër bandës.
Gjenerali Marc de Tarlé, komandant i Zyrës Qendrore theksoi rrezikshmërinë e këtij rrjeti.
“Ky individ është një autor përsëritës krimi, ADN-ja e të cilit u gjet në më shumë se 30 skena vjedhjesh midis qershorit 2022 dhe shtatorit 2024”.
