Rei Manaj u bë protagonist i një ngjarje të rëndë ditën e sotme gjatë ndeshjes së Sivaspor me Goztepe në kampionatin turk. Futbollisti i Kombëtares shqiptare pësoi një përplasje me një kundërshtar, si pasojë e së cilës ai mori një goditje të fortë në kokë dhe humbi ndjenjat në fushë.
Menjëherë shërbimi i urgjencës e transportoi atë në spital për ekzaminime të mëtejshme.
Pas ndërhyrjes mjekësore, fjalët e para të Manajt kanë lënë të habitur stafin e spitalit. Mediat turke raportojnë se sulmuesi, ende në gjendje të qartë, pyeti menjëherë: “A do të mund të luaj në ndeshjen e ardhshme?” Kjo pyetje ka treguar edhe njëherë pasionin dhe dëshirën e fortë të Manajt për të vazhduar karrierën dhe për t’u kthyer sa më shpejt në fushë.
