Në qytetin e Beratit, prej ditësh varrezat e Suelasit janë dëmtuar nga persona të panjohur.
Gjatë natës kanë thyer mermeret e varreve dhe kanë vjedhur objekte prej bronzi dhe bakri, përfshirë vazot e ndriçimit. Roja i varrezave, Polizoi Tavanxhiu, ka raportuar dëmet dhe ka njoftuar policinë, por autorët ende nuk janë arrestuar. Po ashtu roja i varrezave shprehet se hajdutët janë përdorues droge.
“Kanë thyer 10 varre, kanë shqyer alumin dhe kanë vjedhur gotat e bronzit. Janë beqarë, të droguar. Policia thotë kanë qenë 3-4 vetë por ende s’janë kapur”, tha roja.
Për të parandaluar raste të ngjashme, Tavanxhiu ka bërë thirrje për vendosjen e kamerave të sigurisë dhe forcimin e masave nga bashkia dhe policia. Ndërkohë, policia ka identifikuar dy prej autorëve dhe i ka shpallur në kërkim, ndërsa dyshohet se në vjedhje kanë marrë pjesë 3-4 persona.
