Procesi i privatizimit të bregdetit shqiptar po vazhdon me ritme të shpejta, duke kaluar nga një gji i famshëm në tjetrin. Kësaj radhe, është Plazhi i Llamanit në Himarë që po vihet nën kontroll privat, me miratimin e një ndërtimi luksoz në rërën e tij.
Në mbledhjen e fundit të Këshillit Kombëtar të Territorit dhe Ujit, u miratuan mbi 60 vendime, mes të cilave, me numër 26, u dha leja për ndërtimin e një hoteli të ri me emrin “The Concave”. Ky objekt do të jetë një hotel me 63 dhoma, tre dhe katër kate, i projektuar nga studioja portugeze OODA Architecture dhe do të ndërtohet nga kompania Bega-07, në pronësi të biznesmenit Arben Muçobega.
Muçobega është një nga përfituesit më të mëdhenj të lejeve të ndërtimit në Shqipëri, veçanërisht në Jug dhe në Tiranë, dhe ka lidhje të ngushta me qeverinë socialiste. Projekti i hotelit, sipas arkitektëve, është konceptuar për t’u “përshtatur” me peizazhin e Llamanit, por nga fotot dhe planet e publikuara, është e qartë se një strukturë masive betoni do të ngrihet mbi rërën e plazhit, duke zhdukur një pjesë të natyrës së paprekur.
Kjo nuk është hera e parë që tentohet ndërtimi i një resorti në Llaman. Në maj të vitit të kaluar, Komiteti i Investimeve Strategjike refuzoi një projekt të ngjashëm me vlerë 63 milionë euro, për shkak të paqartësisë së pronësisë. Atëherë, zona nuk kishte një regjistrim fillestar në Kadastër, duke penguar procedurat e mëtejshme ligjore.
Por sot, të njëjtët emra dhe të njëjtat kompani janë sërish në lojë. Bega-07 e Arben Muçobegës dhe Capital B, e zotëruar nga Redjan Basha, janë kompanitë që aplikuan për statusin e investitorit strategjik vitin e kaluar. Capital B ndan të njëjtën adresë me Abkons, një kompani ku ortak dhe administrator është Redjan Basha, ndërsa ndërtuesi Besnik Leskaj zotëron shumicën e aksioneve.
Si është zgjidhur papritur çështja e pronësisë që një vit më parë ishte pengesë për investimin? Si u regjistrua prona dhe si kaloi në duart e kompanive ndërtuese? Këto janë pyetje që mbeten pa përgjigje, ndërsa bregdeti shqiptar vazhdon të ndahet mes oligarkëve dhe betonit.
