Një qytetar ka denoncuar në JOQ Albania një fenomen shqetësues që lidhet me faturat e energjisë elektrike të lëshuara nga OSHEE.
Sipas denoncuesit, ai ka zbuluar përmes portalit e-Albania se fatura e muajit shkurt i është gjeneruar përpara përfundimit të muajit, gjë që e ka habitur dhe revoltuar njëkohësisht.
Denoncimi i qytetarit:
"Përshëndetje JOQ! Doja të bëja një denoncim anonim për faturën e OSHEE. Nuk ka përfunduar muaji shkurt dhe mua më ka dalë fatura e muajit shkurt. Sot e hapa nga e-Albania, kontaktova me OSHEE dhe më thanë se është normale. Më pas më thanë të bëja ankesë. Nuk e kuptoj si mund të dalë fatura e muajit shkurt ndërkohë që nuk ka mbaruar akoma muaji."
Si është e mundur që faturat të dalin përpara përfundimit të muajit?
Pyetja që ngre qytetari është plotësisht e arsyeshme. Nëse fatura duhet të reflektojë konsumin real të energjisë elektrike, si mund të lëshohet përpara se muaji të mbyllet? Kjo ngre dyshime mbi saktësinë e matjeve dhe mbi transparencën e OSHEE në raport me konsumatorët.
OSHEE duhet të japë shpjegime të qarta!
Nuk është hera e parë që qytetarët ankohen për sistemin e faturimit të energjisë elektrike në Shqipëri. Shumë herë janë raportuar raste të faturave të fryra, pagesave të pashpjegueshme dhe mospërputhjeve në konsum. Në këtë rast, OSHEE i ka sugjeruar qytetarit të bëjë ankesë, por a do të marrë ai një përgjigje konkrete?
