Kjo është 24-vjeçarja palestineze, Rayyan Alwan, e cila u gjet e pajetë në një apartament me qira në rrugën “Gjon Muzaka”. Pronari i banesës e zbuloi trupin e saj më 27 shkurt, pasi nuk i kishte parë prej ditësh. Viktima kishte plagë të shumta me mjet prerës, ndërsa në dhomë nuk u gjetën dokumente apo sende personale të saj, përveç 10 centëve.
Bashkëshorti i saj, Fadi Alwan, 49 vjeç, dyshohet si autori kryesor i krimit. Sipas hetimeve, ai është larguar menjëherë pas ngjarjes, duke marrë me vete çdo gjë, përfshirë celularin e viktimës. Policia beson se ai ka kaluar kufirin dhe po punon intensivisht për ta lokalizuar dhe arrestuar.
Autoritetet janë në procesin e përcaktimit të saktë të kohës së vrasjes dhe analizimit të provave të sekuestruara. Ndërkohë, ngjarja ka tronditur opinionin publik dhe ka ngritur shqetësime mbi sigurinë e identifikimit të të huajve që qëndrojnë me qira në Shqipëri.
