Çdo shqiptar i aftë për punë që largohet i kushton vendit 14 mijë euro, thotë një studim i ri që detajon humbjet e ekonomisë vendase nga emigracioni i kohëve moderne dhe joshja e rrogave perëndimore.
Një studim për emigrimin e të rinjve në vendet e Ballkanit Perëndimor i realizuar nga “Fondacioni Westminster për Demokraci” tregon se çdo largim dobëson vendin tonë në drejtim të arsimimit dhe punësimit.
Studimi merr në analizë një mesatare prej 41 mijë e 700 persona në vit të larguar nga Shqipëria, duke përmendur se kosto totale e arsimit në vend arrin deri në 500 milionë euro, që në shumë raste kthehen në para të humbura.
Ndërsa shkollimi i një shqiptari në varësi të nivelit arsimor llogaritet në 6 mijë euro për shkollën fillore, 9 mijë e 300 euro për shkollën e mesme, 18 mijë euro për studimet akademike dhe 32 mijë euro për studimet doktorale.
Kjo do të thotë se largimet nga emigracioni i kushtojnë vendit 5-6 përqind të prodhimit të brendshëm bruto, që është një ndikim i konsiderueshëm në rritjen e munguar ekonomike të Shqipërisë.
Përfitimi i vetëm i Shqipërisë nga të larguarit janë remitancat e dërguara nga emigrantët, por kjo vlen vetëm për më të rinjtë në vitet e para të punës në emigracion, dhe nuk përcaktohen si një tregues pozitiv i vendit.
Përveç ndërgjegjësimit individual ose familjar nuk ka mënyra të ndryshimit të kësaj tendence fatkeqe të botës moderne ku shifra e shpërblimit mujor ose ëndrra e pasurisë konsiderohet motivimi i vetëm për të rinjtë.
Rrjedhimisht të larguarit kanë nisur të zëvendësohen me refugjatë aziatikë nga qeveria shqiptare, duke kopjuar një tendencë të parë tashmë në shumë vende të botës perëndimore.
