Administrata Trump dhe Ukraina kanë arritur një marrëveshje mbi të drejtat minerare, një pakt që mund të hapë rrugën për një angazhim afatgjatë të sigurisë ndaj vendit të shkatërruar nga lufta, shkruajnë mediat amerikane.
Në këmbim, SHBA synon të rikuperojë miliarda dollarët e ndihmës humanitare dhe ushtarake të dhëna përgjatë tre viteve të luftës në Ukrainë.
Sipas raportimeve të Financial Times, Ukraina ka pranuar të nënshkruajë një marrëveshje për zhvillimin e përbashkët të burimeve minerare, përfshirë naftën dhe gazin natyror, pasi SHBA hoqi kërkesën e saj fillestare për 500 miliardë dollarë nga të ardhurat e mundshme të minierave.
Duke folur nga Shtëpia e Bardhë të martën, Trump u shpreh mbi vizitën e Presidentit ukrainas Volodymyr Zelenskyy, e cila pritet të ndodhë këtë të premte: "Kam dëgjuar se ai po vjen të premten, padyshim që është në rregull për mua nëse dëshiron të vijë."
Në një takim me Presidentin francez Emmanuel Macron, Trump sinjalizoi se marrëveshja është pranë finalizimit dhe se Zelenskyy mund të vizitojë Washington-in për të nënshkruar paktin.
Në një postim në Truth Social, Trump e cilësoi marrëveshjen si një "Partneritet Ekonomik Jetik", duke theksuar rëndësinë e rikuperimit të miliarda dollarëve të shpenzuar për Ukrainën.
Sipas burimeve të Axios, marrëveshja përfshin krijimin e një "Fondi të Investimeve të Rindërtimit", që do të menaxhohet nga SHBA dhe Ukraina. Ky fond do të synojë investime në miniera, porte dhe projekte të tjera zhvillimore, ndërkohë që SHBA do të kompensojë një pjesë të shpenzimeve të saj për "mbrojtjen, rindërtimin dhe rikthimin e Ukrainës në nivelin e saj ekonomik para luftës."
Marrëdhëniet mes SHBA dhe Ukrainës janë tensionuar javët e fundit. Zelenskyy ka shprehur pakënaqësi për negociatat amerikane me Rusinë për një marrëveshje paqeje, ndërsa Trump e ka quajtur liderin ukrainas një "diktator" për anulimin e zgjedhjeve dhe ka fajësuar Kievin për nisjen e konfliktit.
Me këtë marrëveshje, SHBA po i jep një dimension të ri mbështetjes për Ukrainën: nga një ndihmë e pastër ushtarake dhe humanitare, në një angazhim ekonomik me interesa të qarta për Uashingtonin.
